O funcionamento da biblioteca municipal de O Grove pasa a engrosar a lista de despropósitos deste goberno

O que ía ser a “estrela” da xestión do cuatripartito, converteuse no faimerrir do Salnés.

O Grove, 22 de xuño de 2010.-
Calquera veciño ou veciña de O Grove se puido sentir avergoñado ao ler estes días a prensa, pero é que o asunto non era para menos.

A biblioteca municipal de O Grove, noutros tempos noticia por acadar premios e ofrecer servizos e actividades, foi noticia unha vez máis polo seu pésimo funcionamento debido á lamentable e incompetente xestión dos actuais gobernantes. Os propios usuarios destes servizos, indignados coa situación, acudiron á prensa para amosar as súas queixas e o seu malestar ante a inacción e a mala praxes dun goberno máis preocupado por criticar e enfrontarse ao Partido Popular que por resolver os problemas dos veciños e veciñas de O Grove.

Pero aí non acaba a cousa xa que ademais, tivemos que asistir a un bochornoso espectáculo de declaración cruzadas entre o señor Cacabelos e o señor Mascato, quizás nunha mostra da escasa comunicación e entendemento existente entre os membros do tripartito, que gastaron o seu tempo (pagado por todos nós) en recorrer aos medios de comunicación, nunha vergoñenta loita de egos, para enviarse mensaxes en troques de sentarse a solucionar o problema de apertura das instalacións da biblioteca.

Se, como dicía o señor González, “rectificar es de sabios pero hacerlo todos los días es de necios”, o que fixeron o alcalde e o concelleiro de cultura non ten nome:

• O mércores o alcalde saía pedindo explicacións a Mascato
• O xoves Mascato expoñía nun medio as súas queixas pola carencia de persoal e dicindo que prefería pechar que abrir en precario con xente non cualificada. Vese que ese home a única memoria que ten é a histórica porque non se lembra de que el mesmo puxo atendendo ese servizo xente, seguramente moi cualificada nas súas profesións, pero totalmente alleos ao mundo da biblioteconomía: unha auxiliar de policía embarazada ou voluntarios de protección civil entre outros moitos, das máis variadas procedencias.
• Namentres Mascato se desculpaba como podía, pois xa non tiña a Xan Lamelas para culpalo de todo, Cacabelos aproveitaba para saír noutro medio dicindo que iso non era escusa e pedindo explicacións unha vez máis.
• O venres, o alcalde dicía que se ían tomar as medidas precisas para que non voltara a suceder e volvía pedir explicacións ao concelleiro de cultura.
• Finalmente o sábado o alcalde rectificaba e enviaba un comunicado para ofrecer a información de que esta semana a biblioteca ía abrir novamente só de tarde.
• Pero o domingo o señor Mascato, unha vez máis, contradicía ao alcalde e afirmaba que se ía prestar o servizo en horario completo.

E así, uns polos outros e a casa sen varrer. Namentres estes dous grandes políticos da nosa vila se batían en duelo na prensa, os estudantes seguían a facer cola ante as portas pechadas da Casa da Cultura.

Debemos recordar que a biblioteca municipal foi un dos proxectos “estrela” da concellería de cultura que anunciou a bombo e platillo unha chea de reformas que se ían facer para “acadar unha biblioteca digna para O Grove” (nós pensábamos que xa a tiñamos), en ampliación de horarios e persoal, incremento dos fondos, traslado da Biblioteca González Millán para facer unha sala especializada, etc. etc.

Pero, a única medida que tomou esta concellería foi intentar ampliar o horario porque, segundo dicía el “no goberno do PP non se abría polas tardes” (mentira, como outras tantas).

A realidade é moi distinta do que nos quere facer ver o concelleiro, xa que foi precisamente nestes tres anos de goberno cuatri-partito cando a biblioteca estivo pechada aos usuarios en numerosas ocasións, feito que nunca antes acontecera. Os veciños e veciñas de O Grove teñen esperado moitísimas veces á porta da Casa da Cultura sen que ninguén lles abrirá as instalacións e sen recibir explicación algunha por parte do concello, sobre todo en época de exámenes, cando os estudantes máis necesitan estudar, consultar bibliografía e acceder a Internet para os seus traballos e estudos.

Se a todo o dito engadimos outra serie de despropósitos como o peche da sala de ordenadores, o mal funcionamento da rede wifi, o desmantelamento da hemeroteca, o feito de que non se adquiriron libros para a biblioteca nos últimos tres anos, que a biblioteca González Millán non se lle ve nin se espera, etc. podemos facer balance da xestión da Casa da Cultura, (que foi posta como obxectivo) nos últimos anos.