O concelleiro de cultura é incapaz de poñerse ao nivel das asociacións culturais e dos veciños e veciñas da vila

Antón Mascato segue a dar mostras da súa incapacidade para xestionar a Concellería de Cultura. A parte da contra-programación das Festas do Carme non foi quen de completar a programación cultural do Verán.

O concelleiro de cultura é incapaz de poñerse ao nivel das asociacións culturais e dos veciños e veciñas da vila

O goberno do Partido Popular, con moito esforzo e traballo preparaba tódolos anos o Verán Cultural, actuacións de grande calidade practicamente tódolos días ao longo dos meses de verán, caracterizada pola súa continuidade e a grande variedade dos espectáculos co fin de compracer a tódolos públicos: teatro, cine, folclore, concertos, musicais, baile, exposicións...dábanse cita nos centros de cultura e nas rúas do Grove ao longo de todo o verán.

Estas actividades facían as delicias dos veciños da vila e da xente que nos visitaba durante esta época do ano cunha excelente resposta do público, que confirmaba a O Grove coma un punto referencia no mundo da Cultura. Deste xeito o traballo serio, desenvolvido ao longo de moito tempo, estaba dando os seus froitos e gañando o respecto e a consideración do público

Os anos de goberno do cuatripartito, coa Concellería de Cultura en mans do nacionalista Antón Mascato, botaron por terra todo o esforzo e traballo realizado durante tanto tempo.

Como xa predixemos hai apenas un mes, aparte da contra-programación da semana da Festa do Carme e das dúas películas de Caixa Nova, non foi quen de preparar nin propoñer unha soa actividade máis en todo o verán. A súa falta de iniciativa chega aos extremos de que no Grove tan só se realizan as actividades programadas por outras institucións: Xunta de Galicia, Caixa Nova e , sobre todo, as inestimables programacións das Asociacións Culturais da vila que son as que aportan algunha actividade á vida cultural do Grove.

Sen embargo o concelleiro de Cultura é incapaz de poñerse ao nivel das asociacións e dos veciños e veciñas da vila, é especialista en cortinas de fume pero carece de capacidade de traballo para xestionar as súas concellerías.

Mentres tanto na paxina de Turismogrove do Concello asistimos atónitos ao feito de que a Concellería de Turismo presume da programación de Verán cultural. Na sección Lo más visto o apartado“Verán Cultural” di o seguinte:

Durante la época estival el Ayuntamiento de O Grove prepara un programa específico cargado de actividades: cine en la calle, actuaciones, conciertos... para el disfrute tanto de nuestros habitantes como de los muchos visitantes que todos los años se acercan a nuestra villa en esta época

A qué chea de actividades se refire? Ás que programa o señor Mascato ou ás que programa o señor Olleros?. Pretenden tomarnos o pelo ? Porque, ao fin e ao cabo, non hai más que ver as fotografías que ilustran esta sección para darse conta de que pertencen á programación de veráns culturais dos anos nos que gobernaba o Partido Popular, xa que eles nunca foron capaces de organizar un programa en condicións

Por todo o dito é a nosa obriga suxerir a estes Concelleiros que deixen de aparentar e que se poñan a traballar para o pobo dunha vez porque, como di o refrán, “Dime de lo que presumes y te diré de lo que careces!